Semuhanuka

Nyanza: Abanyeshuri 48 barangije Kaminuza babuze akazi bajya kwiga guteka

Abanyeshuri bagera kuri 48 baturuka mu karere ka Nyanza n’utundi turere bihana imbibi, nyuma yo kurangiza kwiga Kaminuza bakabura akazi, banze kuba mu bushomeri bahitamo kujya kwiga guteka kugira ngo bashake ubumenyi bwo kwihangira imirimo no kujya gukora mu mahoteli.

Abo banyeshuri bamaze amezi agera kuri atandatu biga gutegura amafunguro, kwakira abashyitsi no gusasa uburiri mu kigo cyitwa ‘Rerumwana Center” bahawe inyemezabumenyi zabo kuri uyu wa 20 Ukwakira 2017.

Bamwe muri abo banyeshuri bavuga ko bahisemo kujya kwiga imyuga nyuma yo gusoza Kaminuza kugira ngo bahangane n’ubushomeri kuko babonaga nta kazi kajyanye n’ibyo bize bari kubona kandi no kwihangira imirimo bitabashobokeye.

Adele Mukamugisha ati “Narangije mu icungamutungo muri IPB, nkirangiza nabuze akazi mbona ngomba kwiga umwuga nakora kugira ngo nzihangire umurimo mve mu bushomeri ndetse mbe naha akazi abandi, ubu turi gutekereza uburyo bwo gushyiraho koperative itegura amafunguro ku buryo twashinga resitora nziza”.

Jean de Dieu Munezero wasoje amasomo muri Kaminuza y’u Rwanda ishami rya Huye, we yamaze umwaka mu bushomeri ahitamo gukomereza mu myuga ashakisha ahari amahirwe.

Munezero ati “Akazi ntabwo nahise nkabona, ariko nabonye ko hari andi mahirwe nakongera kuri ubwo bumenyi nari nkuye mu ishuri bikaba hari ikindi byabyara nko kwikorera cyangwa nkagira ukundi nakwiteza imbere”.

Abasore 13 n’abakobwa 35 basoje amasomo yo gutegura amafunguro, gukora ibinyobwa, kwakira abashyitsi n’ibindi bijyanye nabyo bavuga ko bizeye ko bagiye gusezerera ubushomeri bitewe n’ubumenyi bafite.

Bavuga ko batangiye gutekereza uko bazihangira imirimo bashyize hamwe ndetse ngo bizeye no kuzahabwa akazi mu mahoteli na resitora zikomeye kubera ubumenyi n’ubushobozi bifitemo.

Bemeza ko bamenye gutegura amafunguro y’ubwoko butandukanye harimo na mpuzamahanga ndetse ngo bazi no gutegura ibinyobwa by’amoko atandukanye.

Usibye kwiga, aba banyeshuri bashinze itsinda ryo kwizigamira, aho kuri ubu bamaze kugira mu isanduku amafaranga y’u Rwanda asaga ibihumbi 300.

Marie Claire Wizen Hover, washinze iki kigo cyigisha guteka ni umunyarwandakazi uba muri Autriche, avuga ko nyuma y’imyaka 38 aba muri icyo gihugu yahisemo kuza gushora imari mu Rwanda kugira ngo afashe abana b’u Rwanda kwiteza imbere.

Umuyobozi w’Akarere ka Nyanza, Erasme Ntazinda, avuga ko icyo kigo bakitezeho ko kuzagabanya abashomeri bitewe n’ubumenyi gitanga, aboneraho n’umwanya wo gusaba abahasoje amasomo kutazapfusha ubusa ubumenyi bahawe.

Kugeza ubu ikigo “Rerumwana Center” cyigamo abagera kuri 84 harimo abarangije Kaminuza biga mu gihe cy’amezi ane n’abarangije amashuri yisumbuye biga mu gihe cy’umwaka.

Abiga muri iki kigo barimo abaterwa inkunga muri gahunda y’Igihugu igamije kwihutisha ihangwa ry’imirimo idashingiye ku buhinzi, (NEP: National Employment Program -Kora Wigire) n’abandi birihira ku giti cyabo.

 

Abasoje amasomo yo guteka no kwakira abashyitsi bemeza ko bizabafasha kwikura mu bushomeri

 

Umwe mu bize guteka ahabwa inyemezabumenyi

 

prudence@igihe.rw

Leave a Reply

Your email address will not be published.